ماجى مجدى - ماسورة الشعب ضربت



  ماسورة الشعب ضربت


ماجى مجدى 



انت بتكلم نفسك ؟! يا عينى ع الزمن و ع الدنيا !! دى إحدى جمل مسرحيه و لايقه أوى ع الوضع اللى احنا فيه ..

إيه ف البلد ميخلناش كشعب مطحون يكلم نفسه .. شعب مطحون وسط أطماع و غباء نظام فاشل بيبرر أى حاجه و أى حد لمُجرد إنه جبان عن الاعتراف بفشله و غلطه .. 

الدماغ مش قادره تستوعب إن الامتحانات تتسرب م الوزاره و الغلط فيها هيا و يعاقبوا الطلبه ؟! يعنى إيه امتحان يتلغى و يتعاد تانى لمجرد انكوا مقدرتوش تحافظوا ع سلامه الامتحانات م التسريب .. قرار زى ده مفكرش ان أكيد مش الكل شاف المتسرب ! إن فئه قليله هيا اللى شافت و حلت ع الاساس ده .. و الباقى بتعبه و مجهوده .. قرار مفكرش ف تعب الاعصاب و الضغط النفسى اللى الطلاب بيبقوا فيه بأعتبار الثانويه العامه تحديد مصير ليهم و حته تحديد مصير فاشله و بتصُب ع نظام التنسيق العقيم .. مقدرتش ع الحمار فـجيت ع البردعه .. الطلاب نزلوا يتظاهروا قدام الوزاره .. اعتراض ع اللى بيحصل فيهم اتهانوا و اترما عليهم قنابل غاز .. متخيل طالب لسه بيقول ي مسهل ف مستقبلى يتعامل بالطريقه دى ..

طب لو امتحان اتسرب و هيتعاد تانى .. باقى الامتحانات اتأجل معادها ليه .. خايف من يوم ٣٠-٦ مثلآ !! 

يعنى إيه واحده تترحل من بلدها لبلد تانيه ف قرار مكملش يوم .. بمجرد ما مضت العقد مع القناه .. بعبع الحق خوفكوا و اللى هو ازاى نسيب حد نضيف ف البلد دى .. إن مكانش بيطبل ليا يطلع بره البلد خالص .. قرار ترحيلها هو اللى قدم البلد للأحسن يعنى ؟! هو اللى سدد ديون مصر ! هو اللى انهى الحيثيات حول تيران و صنافير سعوديه خلاص ! لا هيا مصريه .. حتى لو القضاء الجديد اللى هيحكم الجلسه الجايه قال سعوديه فغصب عن عين أى حد هيا مصريه .. 

ازاى واحد زى مصطفى بكرى موجود ع الشاشه و بيلعب بعقول الناس الجاهله ! شبه مصر بـ إسرائيل ! متخيل اللى بتكلم فيه ..

طب يعنى إيه يتقدم طعن ضد حكم مصريه أرض و من مين ؟ من جهه مصريه .. اللى هو ي مثبت العقل و الدين 

يعنى إيه الغلاء اللى احنا فيه ده ؟! الاقتصاد بيدمر و يقولك معلش أصلها مؤامر كونيه ع مصر .. مؤامره كونيه ايه ياللى تنشك ف بطنك !! و هو مين فاضى يبص ع بقايا دوله بتنهار من غباء اللى ماسكينها .

احنا بنتباع و بالرخيص أوى .. البلد مديونه للخارج ب ٥٢ مليار دولار .. و ي ريت الدين ده عشان مثلآ اصلاح البلد و لا تحسينها بقى .. لا ده عشان أمرين مهمين جدآ عشان نبنى سجون و نستورد أسلحه .. ما طبعآ معدل الجريمه هيزيد بالطريقه اللى انتوا ماشيين بيها .. الفقر هيزيد أكتر ما اهو زايد .. بس هنقول ايه .. العقل زينه بردوا .. و زينه مش موجوده خالص ف الدوله الفاضله دى .. 

اسجن .. اقتل .. بس صوت الحق دايمآ اعلى منك .. جايز لسه الوقت لسه مجاش عشان متبقاش ف مكانك لكنه هيجى و قريب .. الظلم مهما بيدوم بيخلص .. أه و الله بيخلص . 

و الخوف و الرعب اللى انتوا فيهم .. افتكر كويس انهم مش بسلاح كتير .. لا ده بكلمه بنرعبك و بكوميك و بتويته .. آمن نفسك كويس و افتكر إن لكل ظالم نهايه .


الإبتساماتإخفاء