شيماء عبد الوهاب - الحب خدعة


الحب خدعة.
شيماء عبد الوهاب

وهو عبارة عن توافق روحي فكري ديناميكي استاتيكي تلقائي عفوي بحث يغيب فيه اللاوعي عن العقل..
إيه الكلام الكبير ده؟!
الحب أصعب من كده بكتير، أيوة الحب صعب أوي؛ أصل مش خلاص وقت ما هقرر أحب يبقى هيحصل يعني، لأ وكمان أحط مواصفات في دماغي كده وأول ما هلاقيه أحط إيدي عليه وهيييييه هو ده، لأ.. الحب ورطة بتحط نفسك فيها وانت في منتهى السعادة ومبسوووط، الحب حالة بتحصل لك بتعيشها بكل حواسك ،تحسها كده زي هدايا الكريسماس يا تطلع حاجة تحبها تكمل بيها كل حياتك، يا كابوس تتمنى ينتهي وتصحى من نومك، أو هو البطيخة اللي بتشتريها و انت مش عارف تطلع حمرا ولااااا..
مغلطش اللي قال إن الحرب خدعة..بس أنا بقى بقول إن الحب برضه خدعة؛ خدعة انت بطلها وانت مخرجها
الخدعة اللي بتتمكن منك من غير ما تحس بتستمتع بيها وبعذابها لحد ما تبدأ الحرب..حرب وصراع بيتآمر فيها قلبك وكل حواسك على تخدير عقلك و حصاره لحد الهزيمة والاستسلام، ليصبح عقلك وكل جوارحك موجهين لخدمة القلب يعني من الآخر الحرب دي خسرانة خسرانة، لكن الندم الأكبر لحظة العتاب بين العقل والقلب، لحظة نزيف القلب من شدة ألم بيعصره على دخوله تحدي كان ممكن يتجنبه لو مشي ورا عقله، وكل ده علشان قلب تاني مش بيحس بيك ولا هيحس بيك، و هيتحول الموضوع لصراع على البقاء.
والفائز اللي هيقرر ويدافع عن مبدأ ان البقاء للأقوى، في حرب قلبك بدأها، فمفيش معاك غير حلين:
يا إما تدخل حرب وانت واثق من هزيمتك ف حب ميئوس منه فاتخسر وانت بكامل ارادتك؛ يا إما إنك تحارب وانت متأكد أنك هتنتصر في النهاية وتفوز بقلب اللي بتحبه، يعني يا تدخل التحدي يا بلاش من أولها تتعب قلبك و عقلك.


الإبتساماتإخفاء