محمد خيرالله - زولام



زولام 


محمد خيرالله


ما بين بحب و ما بحبش
فيه صف من البشر واقفين..!
ما بين الواحدة والواحد 
عساكر قلبهم من طين
غريب طبع البشر دايمًا.. 
يحبوا يعيشوا مش باقيين

بحب حاجات متتحبش.. 
عشان م السهل نهزمها
بتاخد وقتها كام يوم.. 
وكام يوم نبقي ناسينها

بحب طبيعة الاغراب، 
وأصحاب النوايا السوء
بحب الناس جدا ليه..؟
عشان الناس دى مش منا..  
تحارب لاجل مصالحها
فبالتالى بتتعرى خلال كام يوم 
وتدفن نفسها وروحها

غريب طبع البشر دايما.. 
يحبوا يعيشوا بنى أدمين..!

بحب الوش لما يبان قصادك 
وش نوع تانى
فى اصله جبان يخاف اللوم..  
يجيله النوم
ينام كقتيل وينسانى

بحب الراجل المجدع ساعة ما يفوق
واحب المجروحين جدا.. 
سذاجة فكرهم فى الغير
ورؤيتهم عن التغيير
 تمسكهم بكل خازوق..!

بحب اللى يقول حاضر 
ومن عيني
كلامه تحسه كالنالوفين..
 مسكن وقت
ووقت الحاجة لوجوده 
يدوب كالملح
تحاول تمسكه بكلمه 
يقولك ايه.. ؟
دا كله كلام يا عم انته 
فـ ليه صدقت..!

صفات الناس واجناسهم وأعرافهم
كأن الوقت بدلها ما بين الثانية 
والتانية 
ساعة بتشيل صحابك 
كل يوم بجميل
وساعات بتحس ناسك.. 
بيشيعوك كقتيل ..!  

بحب اللى يقول ع الصح 
صح ونص
ووقت ما يعمل العمله.. 
بيهرب زيه زي البُرص..!

واحب الناس المعجبة بكلمات، 
ووقت الجد..
 خيرها فى غيره يا حضرات..!
تملى يرددو العبارات 
وهما بالاساس جاهلين
كان الثرثرة فى الدم، 
بتفرز مادة (أدرينالين)
بحب اللى بياخدوا (زولام)
 عشان يتخمدوا مش داريين
بحب كتير 
عشان الكره مش طبعى..
ومش ناوى أقف في الصف 
مع خاينين..!


الإبتساماتإخفاء