د. السيد أحمد - مساء الفل يا صديقى



مساء الفل يا صديقى

د. السيد أحمد


جلسا يتناوبان شد الأنفاس من الجوزة البلدى أم رفاص داير – الواد شحتة معلم والجوزة فى أيده بترقص عشرة بلدى وحلاوته لما يسلكها ويملاها بشوية ميه ساقعة ويرص الولعة عليها وتحت الولعة التعميرة من النوع اللى بيسموه هاى بريفكس – وقول إيه الواد فتحى لمونة يروح حاضن الغابة ولازق بقه فيها وشادد على الآخر – وبالصلى ع النبى تلاقى النار قعدت تطأطأ لحد ما الدنيا تولع وما يسيبش الغابة إلا والحجر مولع نار – ويفضل يكح ويكح لحد ما دماغه تجيب الأرض وتبقى كده التعميرة زى ما بيقولوا ضربت فى النافوخ .

دخل عليهم الواد سيدهم الحلاق ورشدى بتاع البلاط وفى إيد كل واحد منهم لفة .
بص ليهم الواد شحتة وراح مناولهم الجوزة على طول وقال خد ياض بوس الحاجة قبل ما تبرد – التقط سيدهم الجوزة مردداً عمى الكبير أبو الهندزة – سديكى وأنتيمى وعلى طول راح مناوله اللفة وقعد على قرافيصة وحاضن الجوزة وهات يابوس والدخان يخرج من مناخيره بطريقة متقطعة مثل القاطرة التى تدخل محطتها وبص لرشدى بتاع البلاط وهو يخرج الكلمات من فمه بدون وعى – مش قولت ليك ياحمار الليلة هباب .

بص رشدى لشحتة وقاله – الشيشتم إيه النهاردة ياكبير ؟
رد عليه شحتة – صبّاحى يا أسطى جبت المونة معاك ؟
-        أيوه يا كبير بس إنت عارف أنا ليّه شوية طقوس لازم أعملها .
-        رد عليه شحتة وهو فى غيبوبة والكلام بيطلع من بقه بالعافية : الواد مونة ده مثكف فشخ والكلام بيطلع من نخاشيشه مترتب قوى – بيفهم فى كل حاجة وهو أحسن واحد فى المنتكة دى كلها – تعرف يا توحة لما القهوة إمبارح راحت تضرب فى بعضيها علشان الواد ديزل بتاع التوكتوك مش عاوز يدفع المشاريب اللى عليه قام الواد رشدى مونة وفى ظرف ثوان حل المشكلة وخد الواد ديزل على جنب  بهدوء وإتكلم معاه وفهمه غلطه وحاسبه ع المشاريب – يعنى دى بقى سياسة ولا مش سياسة ؟

-        بص سيدهم لشحتة والجوزة بتطقطق فى إيده بعد ماخلص رفرفة – صح يا كبير إمبارح بعد ما إتعشينا الواد رشدى ضرب كوباية الشاى السودة مع سيجارتين البانجو وإداها تكويعة من اللى هيه وفتحنا التليفزيون على كناة ( سوسو باى ) دى كناة محترمة جدا بتجيب فكرات حلوة بتناقش قضايا سخنة جامد تخلى الواحد يسيب اللى فى إيده ويفضل مشدود قوى .
-        ياعم دى بتجيب المذيعة ( فوفو عبد الفتاح ) – ولا يالمونة هو إسمها صح كدة ولا الكلام تاه منى – التعميرة دى جامدة قوى يا صبحى .
-        صبحى مين ياعم – إنت مين !
-        أنا فاروق يا سديكى .
-        يا جماعة الواد راح فى سكة تانية خالص .
-        بقى ياراجل تسيب الكنوات دى كلها وتتفرج على فوفو عبد الفتاح .
-        ومالها فوفو دى ولية وتد كانت زمان بتهز الدنيا على واحدة ونص وبترقص وهى قاعدة وهى واقفة وهى نايمة وبتقول نشرة الأخبار وبتعمل لكاءات مع فنانين وسياسيين وخبرا هو إنت تطول .
-        دى إمبارح كدمت برنامج طبخ ( بالسم الهارى ) والنهاردة إشتركت مع مذيع كبير وعملوا برنامج شارع عبد التواب – وكدمت مع الفنانة الكبيرة شاليمو مهرجان الهيافة وبرنامج طبى إسمه شد ونفخ ومسابقة كل يوم بواخة .
-        تعرف يا حمو أنا شوفت النهاردة الواد ده أبو وسط أستيك بيرقص ولا أجدع رقاصة بيّرعش لاموأخذة الحتة اللى ورا وبيغنى للعنب والحمار وبيقول أوعى وبيتنطط زى القرد –  أنا إستغربت خالص وكنت فاكر إن الصنف اللى كان فى الحجر مضروب وكنت هاضرب الواد عنتيرة بالجوزة بصراحة الواد مزجنجى خالص – كيفنى متقولش عُبّدّ بتاع أبى فوق الشجرة – إلا قولى ياعباس هوطلع فوق الشجرة إزاى ؟ مين اللى رفعة – الأستاذ بتاع الفيلم ماقلش إزاى طلع وإمتى نزل .
-        بص شحتة لعباس وقالة المعلم وصل والمسائل قفّلت معاه جهّز له التكويعة لحسن دا ضرب خالص .
الجوزة بقت حجر داير على الكل وتقريبا المجلس كله بقى فى الطرابوتشى خالص مفيش حد بقى هنا كلهم زى ما بيقولوا هناك وأحلى كلام تسمعه من الحشاشين – وأحيانا تسمع الكلمة ناقصة والجملة عايمة وممكن ما يكملش الواحد منهم الجملة لو حب يتفزلك .
-        متفك ياجدع اللفتين اللى إحنا شارينهم زمان الكباب والكفتة بردوا – هو إحنا جايبينهم نتصور معاهم – وزع يا معلم على الرجالة خليهم يتعشوا – أنا سمعت مرة إن الكيف قصدى الحشيش بيجّوع – ياعم إحدفلى حتتين طرب علشان أشغل المسائل .
التليفزيون المصرى فى نشرة الأخبار – أكد مصدر مسئول بوزارة الداخلية أن الوزارة قد قامت أمس الأول بشن حملات أمنية إستطاعت بمقتضداها القضاء على جميع أوكار تجار المخدرات والوزارة بصدد تمشيط جيوب الإتجار فى المخدرات للقضاء عليها .
بص شحتة ودماغه مش قادر يرفعها – الله الكلام باين عليه بجد المرة دى – بس يافتحى كل ما نسمع الكلام ده التسعيرة بتزيد – إنت تعرف يا سديكى إن القرش فى الكلمتين دول زاد عشرين لحلوح .
-        رد عليه فتحى وهو يحاول الوقوف بصعوبة – هو مش المفروض يا أسطى يوزعوا الكيف مع التموين – مش وزارة التموين لازم تراعى وصول الكيف لمستحقيه .
-        رد سيدهم وهو ضارب تكويعة على الأرض – واحد صاحبى بيقول لى إنهم عاملين وزارة للسعادة فى الإمارات – والوزارة دى مخلية الناس مدلعة  - عايز إنبساط تلاقى – عايز فرفشة تلاقى – عايز ونونة تلاقى – دول بيوزعوا الفياجرا مجانا مع التأمين الصحى .
-        صحيح يا صبحى مش المفروض يوزعوا فرق النقط بتاع العيش كل شهر مخدرات تكيف البشر – ولا الكلام مش مظبوط .
-        صبحى مين ياجدع اللى إنت بتتكلم معاه من الصبح .
            





الإبتساماتإخفاء