محمود عكوش يكتب: الـ "توك توك" المكار


الـ "توك توك" المكار
بقلم: محمود عكوش

حد كان يتخيل اللي جرالنا وجرى لشوارعنا؟! حد كان يحلم في أشد كوابيسه سوادا إن الموتوسيكل أبو تلات عجلات اللي كنا بنشوفه في الأفلام الهندي زمان وبنضحك على شكله الغبي هينتشر في شوارعنا بالصورة دي؟! هذا الموتوسيكل الثلاثي العجلات المدعو "توك توك" والذي اقتبس اسمه من صوت محركه اللي بيعمل تكتكة عجيبة الصوت وهو ماشي؟!

التوك توك ده بقى دليل واضح على فقر وتخلف البلد اللي بينتشر فيها، فهو منتشر بشدة في البلاد اللي ما عندهاش قانون مرور صارم يمنع سيره في شوارع المدينة، ونظرا لصغر حجمه فهو مناسب برضو للشوارع الغير ممهدة، الضيقة، اللي هي برضو من صفات الدول المتخلفة للأسف زينا كده! والتوك توك لأنه خطير جدا على الأرواح والممتلكات لخفة وزنه وهيكله الضعيف وسهولة تعرضه للحوادث، فهو محظور سيره في الطرق، وبالتأكيد ده مش بيحصل في بلدنا، فالتوك توك بقى جزء من حياتنا اليومية، مين فينا مش بيقابل على الأقل توك توك ولا اتنين كل يوم؟ أنا شخصيا بشوفه يوميا على الكورنيش والترام وكل مكان في مدينتي الحبيبة الإسكندرية.

على فكرة، أنا مش ضد فكرة إن لازم يكون في وسيلة مواصلات سريعة ورخيصة للناس المحتاجة لكده، ولا أنا ضد الشباب اللي بتعمل مشروع زي شراء توك توك وتشتغل عليه، دي حاجة مش عيب وحق مشروع في البحث عن لقمة عيش حلال وحياة كريمة، بس ليه ما يكونش ده فى إطار احترام النظام وأخلاقيات الشارع؟

أخلاقيات الشارع اللي بينظمها في المقام الأول الناس اللي في الشارع، و ده طبعا لغياب سلطة المرور في معظم الشوارع، والتي تظهر فقط في الشوارع الرئيسية في أغلب الأوقات، يعني لازم يكون في بروتوكول تعاون مروري مع التوك توك طالما هو بقى واقع، ومن أهم أساسيات البروتوكول ده يكون عدم السير عكس الاتجاه، وعدم تشغيل أغاني الـ "مهرجانات" بصوت مدوي مستفز، وكمان لازم الالتزام بـ إن اللي شغال سواق على التوك توك تكون معاه رخصة موتوسيكل علشان يكون في السن القانوني، يعني ما يكونش السواق عيل صغير غير مسؤول عن أرواح الناس اللي راكبين معاه واللي ماشيين في الشارع كمان، ولا العربيات اللي حواليه!! وأخيرا، طالما التوك توك المكار بقى حتة مننا وإحنا حتة منه، نداء للسادة المستوردين لهذه الآلات العجيبة -اللي مش فاهم بتدخل البلد إزاي وهي محظورة- يا ريت يا بهوات تكون في ألوان تانية للتوك توك، يعني مش لازم أم اللون الأسود القاتم ده، يعني مثلا ليه مفيش توك توك أحمر أو أصفر أو فحلقي حتى؟؟ حرام عليكم كفاية السواد اللي ملأ حياتنا، وبعدين خلوا التوك توك ألوان علشان حلاوته تبان!

سير يا توك توك في أمان، هي يعني جات عليك!!