محمد باهي يكتب: علميني يامّا


علميني يامّا
بقلم: محمد باهي

علميني يامّا كل ساعة
علميني الرجولة والشجاعة
وعلميني إني من مهدي
راجل عايش بس بالقناعة
علميني وشدي حيلي تاتا تاتا
ونوريلي دربي ياما بالسعادة
واحفري في قلبي حبك
والأكادة إن حبي ليكي يبقى عادة
وارسمي الفرح في عمري بطعم صوتك
جوه صورة لعمر أبويا
أحس فيها بحضن أختي
وأما أصرخ أقول أخويا
عارفة يامّا نفسي أرجع تاني عيل
نفسي أصغر قبل ما الأيام تكمل
نفسي أرجع تاني جوه حضنك
نفسي أنام وودني تسمع نبض قلبك
نفسي أشوف أبويا تاني
نفسي بس أحسسه ياما بحناني
نفسي يامّا كان يجيلي مرة بيتي
نفسي يامّا كان يشوف البت بنتي
نفسي إنه كان يكون العمر جنبي
ونتلم تاني في بيتك
عارفة يامّا إيه هي السعادة؟
السعادة لما نتلم في حضنك بالعيال
برجع أحس بالدفا والحياة بتكون خلاص آخر جمال
بأكلة محشي باللمة على الطبلية تجمعنا
في ليلة تكون شتا ومطرة
ونتجمع ونتساير
ونتشاور ونتكلم
عشان من بعض نتعلم
ونرسم فرحنا بلمة
على عتبة أحلامك يامّا