داليا سامي تكتب: كلام هيفرق معاك (٥)


كلام هيفرق معاك (٥)
بقلم: داليا سامي

معظم الناس فاهمة إن الاهتمام هو: كلت إيه، شربت إيه؟ نمت كويس؟ إلخ، كل ده حلو، بس هصدمكم، ده مش اهتمام، دي أسئلة طمأنينة ممكن واحد صاحبك أو والدتك تسألها لك، إنما الاهتمام الحقيقي اللي بييجي عن تفاصيل الشخص اللي بتحبه، عن حياته، عن اهتماماته هو كمان، أيوه اهتمامات الشخص مش بس الشخص نفسه؛ لأن بكده أنت بتدخل في حياته.

الاهتمام باللي بتحبهم لازم يوصل لهم مش بس بالكلام، لأ، الأفعال كمان، ولازم تاخد بالك إن الاتنين بيكملوا بعض، أيوه الكلام والفعل بيكملوا بعض، اهتم بالتصرفات والكلام، الاهتمام بيبقى حلو لما ييجي على غفلة بسؤالك عن حاجة الشخص اللي بتحبه نفسه ناسيها، لما تركز بين الكلام وتعرف إيه اللي بيحبه وتعمله من غير ما يتقال لك اعمل مباشرة ده اهتمام، لما تلاقي نفسك مخصص جزء من تفكيرك مخصوص عشان تبتكر طرق وأساليب جديدة طول الوقت عشان تخلق جو مريح للي بتحبه ده اهتمام، لما تعيش يومك بتفاصيله معاه الصغيرة قبل الكبيرة -ومش لازم تكونوا جسديا سوا الأهم إن قلوبكم وأرواحكم مع بعض- ده اهتمام، لما تهتم باهتمامات الشخص اللي بتحبه ويخرج اهتمامك لكل حاجة حواليه سواء أهله وشغله وأصدقاؤه ولعبته المفضلة ده اهتمام.

الاهتمام ببساطة هو دمج عالمين مختلفين لشخصين ما كانوش يعرفوا بعض، ليصبح عالما واحدا كبيرا جديدا، جواه الشخصين دول بكل الحاجات اللي بيحبوها سوا.