داليا سامي تكتب: كلام هيفرق معاك (٧)


كلام هيفرق معاك (٧)
بقلم: داليا سامي

ما تبصش لحاجة في إيد غيرك أبدا ولا تتمناها ليك؛ أصل ببساطة مش أنت الشخص ده، وغير كده ممكن جدا لما تيجي لك تبقى مش مناسبة ليك، أو يكون وراها شر أنت ما تقدرش تستحمله.

كل شخص له أبعاد كتير في حياته غير اللي أنت شايفها قدامك وعينك هتطلع عليها، في حزن وضيق وغضب وأوقات صبر وابتلاءات، ما تعرفش قوة تحمله إيه، وفقد إيه مقابل الحاجة اللي أنت شايفها وعاوزها دي، فـ مش معنى إنك شايف عند شخص ما جزء حلو نفسك فيه إن يبقى هو ده كل حياته، ما تعرفش هو عمل إيه عشان يوصل لده، ولا استحمل وصبر قد إيه، ولا ادإيه مستنيه بعد كده، وقتها هتقول لأ مش عاوز حاجة، أنا كده مبسوط باللي معايا.

من البداية خليك راضي باللي في إبدك واحمد ربنا عليه، وادعي باللي نفسك فيه واللي يناسبك ومحتاجه، مش بحاجة شايفها عند حد وخلاص لمجرد إنك شايفها، ولما تشوف حاجة حلوة عند حد قول "ما شاء الله، اللهم زدهم وأعطِنا".