سامي نبيل يكتب - كشف حساب


كشف حساب

بقلم: سامي نبيل

كل سنة وأنتم طيبيين، واللي مستني فيكم يعرف مين شخصية العام السنة دي أو حظه للعام القادم أو خط سير الكواكب وطريق الأبراج، يبقى ممكن تسأل نفسك كام سؤال كده عـ الماشي، لو جاوبت عليهم يبقى كمل مسيرتك في الاتجاه الغريب ده والله يبارك لك، وإن شاء الله مصيرك هتصدق إن فى حاجة اسمها خطة ماشي عليها وواقع أنت رسمته لنفسك، ولو لاقيت إني معايا حق في كلامي ومش عارف تجاوب على السؤالين تلاتة اللي جايين دول يبقى لازم تعمل حاجة مهمة قوي في حياتك كل آخر سنة، وهي كشف حساب.

أنت عارف أنت برج إيه في كل بلاد العالم أو معظمها أو حتى بلدين منها بس؟ أنت عارف أنت ليه البرج ده واتسمى كده ليه وبيرمز لإيه؟ هو أنت لسه بتؤمن بالحظ وإن الواقع هو اللي بيشكلنا مش إحنا اللي بنخلق الواقع؟ أنت لسه بتؤمن بالحظ والنصيب وما تعرفش إن في حاجة اسمها اجتهاد؟ أنت لسه مستني ناس تمشيك ورا كلامها وما يبقاش صوتك من دماغك ومن تجارب اللي سبقوك وخبراتهم؟ أنت فاكر أصلا مين شخصية السنة اللي فاتت واللي قبلها عشان تستنى شخصية السنة دي؟

لو أنت شايف إن كلامي صح يبقى كمل قراية، ولو مش شايف ومش عايز تكمل يبقى كتر خيرك ونشوفك على خير في المقال اللي جاي إن شاء الله.

محتاجين نعمل كشف حساب في كل اتجاه في حياتنا، إحنا مين وواقفين فين دلوقتي ورايحين على فين، وهل أنت ماشي في الطريق اللي بدأته قبل كده وشايف إنك متقدم عن النقطة اللي كنت فيها السنة اللي فاتت واللي قبلها واللي قبلها؟ ولا أنت تهت في خط سيرك ولا رسمت ليك خط تاني ولا لسه خطك مرسوم بالقلم الرصاص مش عارف تثبته، ولا لساك ماسك القلم وصفحتك فاضية مش عارف ترسم إيه، أو جايز أنت لسه مش عارف أنت مين وفين وليه ومستني الفرصة، كل ده جايز، بس بالنسبة للفرصة فإحنا اللي بنحاول نخلقها، مش دايما هي اللي هتيجي لنا لحد عندنا، هل بتتقدم في شغلك، بتكتسب خبرات جديدة وبتتعلم حاجات جديدة، شايف نفسك لسه عندك أكتر وقادر تدي وعايز تنمي نفسك في نفس المجال أكتر وأكتر، ولا أنت مش حابب اللي بتعمله زي تلات أرباع المصريين وبتقضي يومك وخلاص من غير متعة ولا خبرة ولا مكسب كسبته في الحياة غير إنك بتجييب فلوس يادوب تكفيك عشان يوم يسلم يوم وتخلص الأيام على كده.

إوعى تكون من اللي المكسب بتاعه ونجاحه بيحسبه بالفلوس اللي في البنك ولا بالقرشين اللي شايلهم تحت البلاطة، بالعكس، المكسب المادي ده أقل مكسب ممكن تكسبه في حياتك، لأنك لو بتحسبها كده فلو خسرته لأي سبب أو اضطريت تضحي بجزء كبير منه في إنك تشتري لنفسك شقة ولا عربية ولا مشروع وخسر ولا راح في أي ظرف هتحس قد إيه إنك محبط وولا حاجة قدام نفسك، فاشكر ربنا على اللي معاك وما تخليش ده هدفك، ولا هتقول لي أشكر ربنا على إيه وفي أحسن مني كتير قوي قوي؟ هقول لك فعلا أنت معاك حق، الشكر ده حاجة صعبه خاصة لو المفروض تكون بتشكر برضا، بس صدقني لو حسبتها بالمشقلب وتفتكر اللي عندك مش اللي مش عندك هتعرف ترضى، فكفاية إن عندك أب وأم أو عيلة أو اخوات أو صحة كويسة وإيدين ورجلين وعينين بتشوف وقلب بيدق وشغل وبيت ساكن فيه وأكل بتاكله وهدوم ساتراك...، مش هتبطل شكر لأن في كتير قوي ما عندوش الحاجات دي.

بمناسبة كلامي ده أنت محتاج برضو تعمل كشف حساب لنفسك في مسيرتك مع ربنا واتجاهك، رايح له ولا ماشي عكسه، شايف نفسك روحيا أحسن من السنة اللي فاتت ولا السنة اللي فاتت هي كانت الأحسن، وشايف لو كملت كده مع ربنا هتكسب ولا هتخسر، أنت عامل كشف حساب للياقتك البدنية ولا غريبة الحكاية دي، أنت شايف إنك بقيت قادر تمشي زي الأول  طيب بتجري، بتركب عجل، بتعمل أي رياضة تحافظ بيها على صحتك، ولا مبلط في الخط ومقضيها أكل وشرب وأنتخة ونوم؟ ليك موهبة وبتنميها، قراية، كتابة، عزف، رسم، كسبت لغة جديدة، نميت لغة قديمة حتى، أو أي حاجة تانية تقدر تحس بيها بالنجاح مع نجاحاتك التانية عشان يبقى عندك حاجة تكمل حاجة ونجاح يرفع فشل، وهكذا؟

ممكن تعمل أكتر من كشف حساب، ولأهداف كتيرة قوي في حياتك، بس لازم تعمله وتمشي عليه، وطول وقتك باصص له، عشان طول ما أنت عندك خطة أو جدول زمني حاكمك بوقت هتحاول تنجز أي حاجة منه عشان تبقى راضي عن نفسك على الأقل، لازم تعمل كده، والخطوات المكتوبة هتفتكرها وتتعلم منها دايما أكتر من أنصاف الأفكار اللي بتيجي لنا وتتوه مننا جوه الدماغ، اعمله بطريقتك ومش هتندم، هتحس بالفرق، لو ما كانش في تقدم ملحوظ في حياتك على الأقل هيبقى في استمتاع بوقتك.

شارك المقال

فيس بوكتويترجوجل +


الإبتساماتإخفاء