هالة عماد - أمنيات العام الجديد




أمنيات العام الجديد

بقلم/ هالة عماد

أنا عاوزة في راس السنة 
عقدين بوسات 
وحلق دهب 
وأربع توكات 
خاتم زمرد 
لأ سافير 
الأرزقات أجمل كتير 
والشال يكون أحمر حرير
والتاج بيلمع والضفيرة للكعوب
إسود بيضوي الرمش 
يخطف ف القلوب
...........

أنا عاوزة في راس السنة 
دبدوب كبير 
سيديهات منير 
آخر عطور نزلت شانيل
وقرنفلة وشجرة ريحان 
وصورة م الحلم اللي كان 
ورواية لإيمان الدواخلي
وحضن من بسمة وعبير 

..............

أنا عاوزة في راس السنة 
تورتة وجاتوه 
فتفوتة منك ....فيها أتوووه 
حلمين جداد علي قد قلبي 
وضحكتين 
علشان ألاقي واحدة 
لو واحدة تتوه
لمبة لطرقة بيتنا بس ما تتحرقش
سكة عليها ما نتخانقش
مركب شراعي
وموج .....عيونك...يعشقوه
كورنيش ونيل
ترمس بيحلم بالشفايف يلمسوه
وكلام بيترجي عيونك يهمسوه
أنا عاوزة في راس السنة 
نسخة جديدة لحبنا 
إصدار جديد مني أنا



الإبتساماتإخفاء