ماجى مجدى - الجوازة المسيحية


الجوازة المسيحية 

بقلم: ماجى مجدى


من كام يوم سمعت جمله حسستنى بالوضع اللى احنا فيه اوى .. سواق كان بيقول لواحد على نوع عربية (دى عامله زى الجوازه المسيحيه يا جدع تلبس فيها طول عمرك و متعرفش تخلع.. فكرتنى بمصر مع السيسى) .

الواحد فعلا بقى حاسس إنه لابس فيه، مش عارفين نخلع، لا منه و لا من الحاشيه بتاعه اللى يعتبروا احتلوا البلد وورثوها لنفسهم و لعيالهم .

واقعين وسط حاشيه مصدقه ان رئيسها مختار من عند الله و انه الملاك و شايفينا الكفار اللى بيخربوا عليهم بلدهم الجميله المليئه بالخيرات و الاشتغالات بتاعتهم دى، حاشيه لسه مصدقه ان الدولار بينهار قدام الجنيه المصرى حتى بعد ما وصل في البنوك نفسها لسعر ٢٠ جنيه مش حتى السوق السوداء ، حاشيه شايفه اللى مبنشوفوش ، شايفين انجازات السيسى اللى متتعدش من كترها بالنسبالهم و احنا متتعدش من قلتها بالنسبه لينا ، شايفين إن احمد موسى اعلامى مهنى على حق و قدوه ليهم و ارءاه و تقاريره و اخباره بتتأخد على محمل الجد جدآ ، مصدقين ف مصداقيه الاعلام المطبلاتيه ككل مصدقين التلفيق و التكذيب و كلام الوزراء ، أه و الله مصدقين كلام اللى عاملين نفسهم مسؤلين .. متخيل !! حاشيه شايفه إن مفيش احسن من مصر و مع ذلك بيبعتوا ولادهم يتعلموا بره مصر ، بيسافروا سياحه بره مصر ، بيهاجروا بره مصر ، بس ثابتين على مبدأ ي جماعه و هو تحيا مصر و الله يكون ف عونك يا سيسى من المؤامرات الكونيه و الارهاب و الاخوان اللى هما بالمناسبه معظمهم فى السجون حاليآ ، بس هو اى صوت خارج سرب الحاشيه المشرفه دى يعتبر اخوان و عميل و ابن كلب كمان .

وصل بيهم الحال لانهم بقوا شايفين الخراب حاجه كويسه ، إن غلاء الاسعار بشكل جنونى أمر طبيعى للى البلد فيه ، مصانع كتير قفلت بسبب تعويم الجنيه و استثمارات كتير خسرت اكتر من نصف رأس مالها و اضطرت انها تصفى استثمارتها ف البلد زى مرسيدس صرفت النظر عن مصر خالص و افتتحت مصانعها الجديده فى الجزائر ، شايفين إن تفريعه قناه السويس مشروع ناجح جدآ و مغطى تكاليفه و ارباحه بالرغم من إن ايرادات قناه السويس حققت اقل ارباح على مر الـ ٢١ شهر اللى فاتوا ، معرفش هما بيشوفوا من أنهى اتجاه ، بس الظاهر من كتر حبهم للسيسى بقى بالنسبالهم مرايه الحب عاميه ، غشاوه سوده على عينيهم حاجبه عنهم الصوره الحقيقيه لوضع البلد .

لو مسافر بره مصر لاأى دوله اوربيه او عربيه حتى بمجرد ما تقابل حد و يعرف إنك مصرى يا بيتجنبك يا بيبصلك بصه كلها شفقه ، شفقه اللى هو ازاى وصلتوا للحال ده ، ازاى مصر ام الامن و الامان المستثمرين يهربوا منها  و السياحه تنضرب فيها بالشكل ده ، حاليآ الدول الاجنبيه بيخافوا يبعتوا وفود من عندهم يرجعوا ناقصين واحد و لا اتنين ، يتقتل مثلآ زى ريجينى اللى الحكومه المصريه اتعاملت مع قضيه قتله بلامبالاه ، شفقه على اننا جهله بالنسبه ليهم ، تعليمنا بره التصنيف العالمى للتعليم يعنى غير معترف بيه بالمره ، يعنى زمام كان يقولك الشهاده دى يا باشا بتتعلق على الحيطه او بلها و اشرب ميتها مش هتبقى مقوله بس دى بقت واقع ، المشكله مش فى إن التعليم خرج من التصنيف العالمى ، المشكله فى رد فعل الرئيس المتعلم الواعى اللى كان رد فعله بأن هيفيد بأيه التعليم فى بلد ضايع اساسآ ، يعنى يا ابنى انت و هو متحرقش دمك على نص درجه فى التنسيق و لا يهمك كليه ايه ، كله بلح.

عايشين فى بلد الجلاش بالمهلبيه ، مفيش حلول لأى مشكله ، مفيش غير تراجع فى العقول المسئوله عننا ، رمى الحمل و المشاكل ع اى منظومه سابقه ، مفيش بحث خارج الصندوق و لا داخل الصندوق ، المنظومه عدت الوصف بالعقيمه ، عشان كده البلد بقت (سورى يعنى ☺) عامله زى الجوازه المسيحية..!




الإبتساماتإخفاء