محمود الصادق - يا شعب مصر



   "يا شعب مصر"

محمود الصادق


يا شعب مصر 
فيك الصالح والطالح
فيك الظالم والمسامح
فيك المخلص والخاين
والشهيد أبو دم سايل 
فيك البنت بنت رجال
وان كتفوها بألف من الحبال
تصرخ وتقول انا بنت مصر
بنت الأزهر والكنيسة
بنت الإمام والقداس
في إيدي هلال 
وجنب مني صليب
وهنشر السلام 
ان شالله لو لغريب
انا بنت اتولدت في الإسلام
وبحب كل الطوائف والأديان
كل الأجناس والألوان
أنا بنت لكني مثلك يا إنسان

يا شعب مصر يا معصوم 
فيك الطاغية والفرعون
فيك من كل شكل ولون
يا شعب غلبت في وصفك
مهما يقيدوك أو يحبسوك
لا يمكن تبكي أو تدمع
لو يحكمك ملتحي أو جنرال
لا يمكن تخضع

يا شعب غلبت في وصفك
حر زي فراشة طايرة 
زي شعر الغجرية
زي قصايد درويش في الحرية
وزي نضال جيڤارا 
وزي كلام عمر في العداله
يا شعب مصر عزيمتك عفيه 
وقوي زي صخر الجبال
زي سهم النبال 
زي رسم الرجال
زي الثورة في وش المحتال

يا شعب مصر 
نارك والعة وحاميه
تصهر كلبش الحكام
تتعدي أي حظر
تعادي أي سجان
يا شعب عاشق للنصر
زي ورده في وسط شوكها تفتح
زي قمر منور في الظلام 
زي أطفال سوريا تمام
زي أحرار القدس قدام الكلاب
يا شعب مصر متقلب الأحوال
لا ليك عزيز ولا سلطان
ولا فرقت بين عسكري أو إخوان
كان كل همك سلامة الإنسان

يا شعب مصر يا ولهان
احتار في عزمك الحكام
والباحثين والدارسين
والمهتمين بعلم الجينات
يا شعب الفكر والفن
حدك السماوات
يا شعب مصر غلبت وياك

شارك المقال

فيس بوكتويترجوجل +


الإبتساماتإخفاء