يوسف فؤاد - إزاي يا حوا

إزاي يا حوا



كتب/ يوسف فؤاد

في نهاية كل قصة لازم نفهم العبرة
والدنيا لو دارسها هتلاقي جوا ناسها صنف يسمي أنثى
حاسب في يوم تدوسك  وإوعي في يوم تدوسها
بتكون هي بطلة القصة من أساسها 
فا ازاي يا حوا تكوني أم وتربي جيل يطلع مهم
وتكوني أساس كل دار
وازاي بتبقي الحسنة والسوءة
وبتبقي كل الأفكار
إزاي يا حوا تحت أقدامك الجنة
وانتي أغلب أهل النار
إزاي بتبقي دم لكل هم فبتجري فيه
وتحركيه وتضخي بؤس لكل جزء ليه
إزاي بتبقي للأحزان خلايا
وانتي برضو جين للسعاده مختفي
يامكتشفة المواهب يا خيط مربوط وسايب
يا نص عقل مدي خلايا لقلب دايب
يا كمنجة جوا عود يا وهم الوعود
يا أسرع حد لازم يكون بيكي مربوط
يا شوك في كل ورد يا دفا في دنيا برد
يا مية كتير بتروي وساعات تهد سد
يا أطول قصة سرد
يا مُسببة الكآبة ومُلهمة الكتابة
يا جرعة حب زايدة بتزود في المهابة
مهابة طيف حضورك لعقل سارح جدا
بيحلم بالسلام لكنه وسط غابة
يا نقطة في كل كلمة وكلمة في كل جملة
يا حكمة لازم تطلع من كل كلمة بقولها
يا شمس لكل ليل لازم تطلع في يوم
يا نقطة في كل بحر لازم عليها أعوم
يا جد وقت هزار وفطار في وقت صوم
يا كتير بتكوني ضعف وأكتر بتكوني قوية
إزاي يا حوا تبقي كل الحاجات دي هي
وازاي جنون الرجال بيكون سببه انتي
يمشي المجنون لوحده لكن في خياله انتي معاه
مش داري بنفسه وشايف فكل الناس شيفاه
إزاي يا حوا بتبقي نموذج للجنون
وانتي اللي كل عظيم لازم تكوني وراه
اترسملك في خياله وفي اماله كل حاجة
كان إيه اللي يجبر واحد اعور يحب عاميه بالسذاجة
مختلفه في كل شئ اكمنك اصله
أعوج ضلعك كل حد يبعد يتمني يرجع جنبك
وكل حد جنبك عايز يتخلص منك
انتي الممكنات لطريق ماضيه كان مستحيل
وانتي السبب لدموع كتير بدون تبرير
انتي السبب لكل خطوة بميل
انتي الكلام وقت العتاب
وانتي الحساب ورد الجميل
انتي الزمان وانتي المكان
وانتي القمر لنجمي الكبير
انتي السبب لكل راح والممكن لأي جي
انتي الحياة لكل ميت والموت لكل حي
انتي كلام الوهم وآمال الحلم
وجبال العسل وأنهار السم
انتي المحفزة لكل مادة والمسببة لكل كارثة
ازاي يا حوا بتبقي فرحة الحرب بعد كل نكسة
انتي الخيط الرفيع بين المحب والكاره
وانتي الدقيقة الفاصلة بين النهاردة وامبارح
انتي اللي أنا معرفش أكون فيها مش سارح
ف ازاي يا حوا تبقي انتي الداوي والجارح
ازاي بتبقي الحاجات كلها ومع كل حاجه وضدها
ازاي يا حوا جامعة كل الصفات وعكسها
القصه معاكي يا حوا بتكبر وبتبقي روايه
حجمك أكبر من انك أختصره بحبه معايا
كل اللي بيظهر ليكي عشر الموجود جوايا
ازاي يا حوا بقيتي مجهولة في كل حكايه
والحكمة من قصتنا ونصيحة مني ليا ومن كل أهل الخبرة
إوعى تصدق بأنك لازم في كل قصة دايما تفهم العبرة

شارك المقال

فيس بوكتويترجوجل +


الإبتساماتإخفاء