نهال عزازي - نزلة برد



نزلة برد - قصيدة 

بقلم: نهال عزازي

 بعاد فــ حنين

سهر نيكوتين

وغربة روح

وجع مزمن

صداع بالراس

وجع إحساس

صداع الروح

مايتسكن

 ماضيك مُحتل

دليلك ضلّ

وجواك ملّ

مــ الوحدة

وشايك مُرّ

وليل بيمر

ولسه مُصِّر

ع الحال ده

نفس الذكرى ليلاتي تحاوطك

ليه بتطاردك يوم ورا يوم

كل اللي بيسأل ايه تاعبك

انت ترد دي "قلة نوم"

حبة سقعة بقوا قادرين

ينيموك كم يوم ورا بعض

مش هو ده دور الحنين

اللي مسميه "نزلة برد" ! 

ايه الإنجاز إنك تهرب

كل اللي بيهرب بيتوه

ايه اللى يموّت في القرب

ما البعد بيقتل عن عمد

ايه الإعجاز إنك تبعد

عادة اللى بيبعد ينسوه

ايه اللي لاقيته في الوحدة

غير إحساس دايم بالبرد

بطّل تشخص أمراضك

تشخيص تملى مش مظبوط

كفاياك تعيش كده مربوط

 بحاجات أول خيوطها سراب

إوعاك تكدب على روحك

لو حتى الطبع فيك كداب