إسلام محمود - ورقة






ورقة


شعر: إسلام محمود محمد السيد


ورقة ومتنية .. قصة ومحكية

والبنت هي البنت إنسانة جنية



يصفى عكار البحر إن مس جدايلها

يحلى مرار البر من حلو عمايلها



اتقسمت الأرزاق والزينة ما اتقسمت

كاملة من الخلاق .. حورية واترسمت



الاسم ما ينقال خوف الحسد ع السمع

وإن جه خيالها ف بال بيتوه ف طرح وجمع



لو كات قلوبنا وشوش .. كان قلبها شافني

بس الجميل مغشوش .. ينضر ما يعرفني



أنا أحلى خلق الله .. يوم إنسأل قلبك

ومنعتي عني الآهـ .. دي الآهة بتحبك



شوري تراب الأرض .. حبيت عليه قد إيه

والسجدة سجدة فرض يوم إن خطرتي عليه



أغير عليك أوصفك .. تنشاف بغير عيني

وإن عز فيك الشوف .. طيفك يوافيني



لا البعد برّد شوق .. ولا حلم قربني

لِسَّاني أنضر فوق .. للعالي يلمحني



فوق السما سما .. وأنا ف التراب عاشق

ارسم ف قلب ارتمى .. بس البعاد فارق



أحلم أطير بجناح .. وألمس طرف توبك

حد القدم وأرتاح .. حاشى التراب توبك



خطوة يمين قدام .. عشرة شمال ورا

بتطمعك الأحلام .. برجوعة متقدرة



ولقيتني بره السور .. واقف بمرسالي

الدنيا ليه بتدور .. وإنتي إللي جايالي



قريتي حرفي إزاي .. والورقة ما انفضت

وف ثانية كنتي معاي .. والثانية ما انقضت



قلتي الكلام وصَّال .. خلِّي الكتوبة بعيد

قلبك بعينك قال .. وإللي في قلبي يزيد