الـ "copy & paste" وحقيقة سرقة فيس بوك لمعلوماتك الشخصية


الـ "copy & paste" وحقيقة سرقة فيس بوك لمعلوماتك الشخصية

محمد خيرالله

#بوست_مهم جدًا يقرأ بعناية لإنهاء حالة اللغط والجدل فى بوستات الكثير من مستخدمى #فيس_بوك العرب وخاصة #المصريين.

انتشرت فى الأونة الأخيرة موضة الـ "copy & paste" لبوست بعينة يفيد مضمونة أن الفيسبوك بيستخدم برمجيات تسمح بسرقة المعلومات الشخصية. والجزء دا مش صحيح، هو فعلا الفيس بياخد معلوماتك الشخصية وصورك وفيديوهات وأى حاجة انت بتكتبها، بس دا بيندرج تحت مسمى (cookies policy - ملفات تعريف الإرتباط) والفيس بيستخدم الحاجات دى علشان يقدملك خدمة أفضل، مثلا انت لو مسجل انت شغال دكتور على فيس بوك، الفيس من حقه انه يستخدم التعريف المهنى والمسمى الوظيفى لك علشان حاجات كتير أهمها تقديم الخدمات لك، سواء فى صورة اعلان عن وحدات إدارية تصلح عيادة، أو اعلان عن مؤتمر طبي، أو اعلان عن شركة أدوات طبية.. وهكذا، ودا المتبع فى كل المواقع وانت بتوافق عليها قبل انضمامك لأى موقع مش الفيس بس.
ولو انت تعبت نفسك شوية ودورت على صحة الكلام دا من عدمة هتلاقى فيس بوك كاتب لك بالنص..
"نبذل قصارى جهدنا للمحافظة على أمان فيسبوك، ولكننا لا نستطيع ضمان ذلك. نحتاج إلى مساعدتك لإبقاء فيسبوك آمنًا، نحن نستخدم ملفات تعريف الارتباط والتقنيات المشابهة لتقديم ودعم خدماتنا وكل الاستخدامات الموضحة والمشروحة في هذا القسم من سياستنا.
اذا مفيش حاجة اسمها الفيس عنده برامج تجسس او سياسات توجيهية جديدة.
أما الكلام اللى اتنقل عن حماية حقوق الملكية الفكرية وموادها الغريبة اللى فى البوست العجيب، فدا كلام فارغ لان مش معقول كل الصور اللى انت بتنشرها من ابداعك، على كدا بقى كل اللى نشر صورة كتابي #كوابيس_مملة ليه حق ملكية فكرية فى الكتاب..!
وعلشان نكون أدق بموجب المادتين L.11 و 112 و 113 من قانون الملكية الفكرية اللى ملهومش أساس من الصحة لان مفيش مواد بالإسم دا أصلا ولا حتى مواد حقوق الملكية بالأرقام دى بتتكلم عنك كشخص معنوى، لان الأرقام دى بتكلم الشركات الاعتبارية فى حقوقها الخاصة بالعلامات التجارية، والنزاعات القضائية واحكامها المتعلقة بيها فقط لا غير.. يبقى مش البوست اللى هتنشره يبقى ماركة تجارية..!
الجزئية الأخيرة الخاصة بانتهاك الملف الشخصى والحرية الشخصية سقطت أصلا بموافقة على الإنضمام للموقع، دا غير ان مفيش حاجة فى القانون اسمها في (UCC 1 1-308 - 308 1 -103 ونظام روما الأساسي). زى ما اتقال فى البوست اللعين.
هو فعلا الفيس بوك كيان مفتوح للجميع بشروط تحمى أمن الموقع وسلامة العملاء الشخصية، وفى معايير المجتمع اللى اعلن عنها فيس بوك فى سياساته اهتم بيك فى الأول كعميل تسويقى، مش علشان سواد عيونك، ومن معايير المجتمع ان الفيس ممكن يقفل حاسب اى شخص بيحرض ع العنف او الكراهية او ماشابه #من_أجلك_انت ومن حقك انك تبلغ عن اساءة وبيتم التعامل معاها، وبخصوص  الملكية الفكرية الفيس نفسه قالها لك صريحة..
"فيسبوك هو مكان يمكنك فيه مشاركة الأشياء التي تهمك. تؤول إليك ملكية كل المحتويات والمعلومات التي تنشرها على فيسبوك، ويمكنك التحكم في كيفية مشاركتها من خلال إعدادات الخصوصية وإعدادات التطبيق. بالرغم من ذلك، فقبل مشاركة أي محتوى على فيسبوك، يرجى التأكد من أن لك الحق في القيام بذلك. نطلب منك احترام حقوق النشر والعلامات التجارية والحقوق القانونية الأخرى."
يبقى العيب مش فى سياسات الفيس بوك، احمى انت بس حقوق الملكية الفكرية للغير ومتخدش البوست بتاعى دا copy paste..


وبكدا أنا مش عايز اشوف تانى البوست دا على صفحة حد من الأصدقاء، دا حتى الترجمة بتاعته Local قوى..  

شارك المقال

فيس بوكتويترجوجل +


الإبتساماتإخفاء