أربعة نصائح تجعلك تستطيع إقامة حفل توقيع ناجح لكتابك فى اى وقت




أربعة نصائح تجعلك تستطيع إقامة حفل توقيع ناجح لكتابك فى اى وقت

كتب: محمد ممدوح خيرالله


حفلات التوقيع، وأطلقت عليها منذ صدور كتابي الأول فى عام 2011 "ضحكة فردى" حفلات الشحاتة المجانية، نظرًا لنفاذ عدد كبير من النسخ التى تحملت تكاليف بيعها كاملة، وتكاليف مكان الحفل، وتكاليف "الجاتوه والحاجة الساقعة كمان". فقط لأجلس لساعة أو اثنان اقرأ على الحضور بعض من قصائد ديوان ضحكة فردى الصادر أنذاك عن الهيئة العامة لقصور الثقافة، ومرت الليلة بسلام، واستفدت من التجربة الكثير والكثير ربما تكون الإستفادات والنصائح التاليه جزءًا من تجربة هذا الحفل، وبعد شهور قرر مركز بيت القصيد بالمنصورة إقامة حفل توقيع لكتابي، كانت فاتحة خير، لربما صرت مشهورًا والأن أطلب بالإسم، وبعد تحديد الموعد، جلس الكتاب وكاتبة فى إنتظار القارئ الذى لم يأت.. فالصدمات لا تتمكن من الكاتب المبتهج بطريقة صعبة، يكفى أن يشعر بأن هناك خلل ما قد يعكر صفو مزاجه التفائلي لدقائة، ولكن سرعان ما تماسكت، ومن ثم رحلت.. وبمقارنتى للتجربة الأولى للحفل، والتجربة الثانية للحفل، إستطعت أن اتأكد من كون القراءة شيئ مبهج وجميل وراقي إذا كانت بالمقبلات وفواتح الشهية دون وجود لفاتورة أخر اللقاء، أما اللقاء الثانى، فلم افكر به إطلاقًا ولم أفكر فى اسباب فشله.

كانت نيتى أن انهي علاقتى بحفلات التوقيع نهائيا مهما كان، أو الى أن أقوم بالخطوات الصحيحة التى تمكننى من إقامة حفل توقيع يستطيع فيه الناشر بيع أكبر عدد من الكتب، ومع الوقت صدر ديوان "كوابيس مملة" وتقرر عقد حفلا لتوقيعه بمعرض الكتاب 2016 والتزمت بالقاموس الفكرى العقلانى التسويقى الإجتماعى ال و ال و ال .. الخ .. الخ .. الخ .. حتى ما لا الخ فيه، وبالفعل.. انهالت الإتصالات والتساؤلات على موعد الحفل والمكان، ثم... حدث ما لا يمكن توقعه..!

للأسف الكتاب مخرجش من المطبعه..! الحفل اتلغى، فعادى انت ممكن تتحمل الصدمات فى سبيل حلمك وهدفك فى الحياة، بس انك تفكر تعمل حفل توقيع تانى تبقى لامؤاخذه بتفهم جدا بالعس، لأن مستحيل اللى جالك مرة هيجيلك تانى..!


طيب المهم علشان تعمل حفل توقيع ايه المطلوب؟



1 - النصب

لازم تكون نصاب بدرجة غبي، بمعنى لو انت بتكتب كويس جدًا، برده خلى عندك الشك فى نصوصك المكتوبة، فبالتالى انت محتاج كام واحد علشان الشك اللى عندك دا يروح؟ عد بقى على عدد الناس اللى هتديهم ثقتك فى نفسهم وإنهم ال و ال وال والخ، الخ..!

2 - النصب والكذب

لازم تقرأ، بأى طريقة، ومتقرأش فى مجال واحد، كل المجالات، أنت متعرفش الريفيوهات اللى ع الجود ريدز دى ممكن تعمل منك ايه، ممكن تعمل كام صديق من الكتاب، وكل المطلوب منك، اقرأ الريفيو.. ابحث عن اكونت الكاتب، عيد صياغة الريفيوا (اخلط كله فى بعض).. ثم امدح مدحا شديدا جدا، والف مبروك.. بقى عندك كاتب بتحبه وبيحبك، وممكن بعد ما كذبت عليه تنصب عليه وتستعمل رقم (1) معاه.

3 - اى هيصة خش زق

متقعدش ع الفيس تتابع البوست خد كام لايك، اللايكات بتيجى تاتا تاتا، انزل احضر اى حفل أو ندوة زوق فى الناس وقول انا موجود واتعرف علي كل اللى موجودين، وعيش بقى مع الناس الجديدة دى الخطوة (1) و (2).

4 - وحيات ولادك يا شيخ

اسلوب الشحاتة بالنص كدا، أو لو عندك طريقة تانية تقدر تشحت بيها اوك، اشحت براحتك.. بس خد الداخلة دى، وحياة ولادك يا شيخ، يا عمنا، يا خال، يا حبيب اخوك، يا استاذنا وتاج راسنا، يا اسطى، (اى حاجة بعد " يا" على حسب الشخصية) أنا عندى بعد اسبوع حفلة كتابى، وعايزك تساندى انا عارف انى اتعلمت على ايدك، وانت اخ كبير أو صغير (مش مهم).. لازم تبقى أول الحضور، وطبعا تليفونات الناس من اول السنة بتجمع فيها.

تانى يوم، هستناك بقى يا باشا.. دا انت هتنور المكان دا انا قولت للناس كلها مثلا (عمرو دياب صاحب كليب الليلة) جاى الحفلة أو مثلا (حسن الجندى بتاع الرعب جاى الحفلة).. وهكذا مع أول 20 واحد هتكلمهم النهاردا، والعشرين بتوع بكرة، وال وال وال الخ الخ ..!


اعتقد ان الحفلة دى لو نجحت لازم ولابد وواجب انك متجيبش سيرة الخطوات دى لأى حد تانى ولا تالت. وتبلغنى عملت ايه  ☻ أنا مكدبش عليك هو الموضوع فى الأول وفى الاخر شلة بتسند بعضها وبتعمل هليلة حولين كل واحد منهم فانت لازم تدخل فى شلة تكبرك وتكبر معاهم، يا تعيش تكتب لنفسك وخلاص. الموضوع صعب وحفلات التوقيع للناس اللى معندهاش معارف خارج الفيس طبعا واتقابلوا معاهم واتكلموا.. فمفيش حل الا العلاقات. والطرق اللى فوق دى انت ممكن تجربها، انما انا عن نفسي مبعرفش اعمل كدا وعلى العموم المقال دا لو مش عاجبك اعتبره ساخر☺


شارك المقال

فيس بوكتويترجوجل +


الإبتساماتإخفاء