بولا وجيه - انت عاوزنى أفشل؟َ



انت عاوزنى أفشل؟َ

بقلم: بولا وجيه

كام مرة فكرت تاخد خطوة أو قرار علشان تتقدم بحياتك ورجعت فيه في النهاية؟!

كام مرة قولت أنا هعمل الحاجة الفلانية علشان أنجح وفي الأخر قررت أنك متعملش الحاجة دي "خوفاً" من أنك تفشل؟!

كتير، كتير جداً كمان، صح؟؟؟

كان فيه جملة لنجيب محفوظ وأتكررت في فيلم "مولانا" كانت بتقول: "الخوف مبيمنعش الموت لكنه بيمنع من الحياة"

الخوف الصراحة بيفسد كل حاجة حلوة أنت بتفكر فيها، علشان دايماً بتفرض الظن السيء في نفسك وفي قدراتك وكمان في ربنا!، أصل ازاي ربنا اللي خلق كل حاجة في الكون هيسمح بأنك تفشل!

في الأنجيل، ذكرت كلمة "أنا معك" بعدد أيام السنة يعني 365 مرة وفي أكتر من مكان في الكتاب المقدس، كأن ربنا بيقولك أنا بجددلك وعدي بأني معاك كل يوم في السنة

طب لما ربنا يكون بيطمنك كل يوم، أيه اللي يخليك تقلق في الحياة!، ولا حاجة!، لأن ببساطة زي ما قال دكتور إبراهيم الفقي: "إذا كنت مع الله فأنت مع القوة العظمى"

ليك الحق أن تخاف وتفكر في كل خطوة، لكن برضه قبل ما تخاف لازم تعرف أن ربنا وعد وعدين صريحين جداً، واحد في الأنجيل والتاني في القرأن، وهما "الله السماء يعطينا النجاح ونحن عبيده نقوم ونبني" والتاني "وأن ليس للأنسان إلا ما سعى".

يعني ببساطة حضرتك هتنجح وهتحقق كل اللي نفسك فيه، بس أتعب وأسعى وأجتهد وأعمل اللي عليك علشان لما تقف قدام ربنا في صلاتك تقوله يارب أنا عملت اللي عليا أديني اللي وعدتني بيه، أن على قد سعيي هيكون نجاحي.

وأفتكر دايماً "أن خوفك ده مش هيمنعك من أنك تفشل، بس هيمنعك من أنك تنجح وتحقق كل اللي نفسك فيه 😉 "

شارك المقال

فيس بوكتويترجوجل +


الإبتساماتإخفاء