عبدالله الأمير - وبعدين..!




وبعدين..!


بقلم: عبدالله الأمير

وبعدين..!
انا قلبي مات مرتين
الحب عمره ما كان امين
بنحب ناس مش طيبين
تقدر تقول دول كدابين
او حتي يمكن نصابين
او هما اصلا بارعين
ف الخداع ف الضياع
وف سرقة الجاي م السنين
دول هما اصلا غدارين
او فنانين او بارعين
يسلبوها البسمة منك
ويرجعوا قلبك حزين
لو قلت حبيتهم كمان
بيحسسوك الاهتمام
وبياخدوا منك الأمان
يجرحوك وبانتظام
وجرحهم غطّي المكان
لو قلبك انت كان سفينه
هيحطومك ويبهدلوك
لجل اما تغرق ويسيبوك
تقعد وتشكي الحنين
لو عشت عمرك بتفاديهم
هيقولوا عمرك ده قليل
هيقولوا حبّك مستحيل
وان قلت فرحك جنبهم
تلقي الايدين ممدوده ليك
وشايله ف كفها سكين
هتجرحك وهتدبحك
وتعيش وتسهر كل ليل
اوعاك ف مرة تكون بديل
او حتي مركون ع الرفوف
ف وقت العوزة يمسكوك
يهتموا بيك ويجملوك
لحد ما ييجي البديل
هيتركوك وهيهملوك
ترجع لرفّك بالأنين
وازي قلبك الحزين ؟
عطشان حنان من ما
كنت انت رافعه للسما
وداس عليك ف وحل طين
وازي عينك والدموع ؟
لما بتحلم بالرجوع
كانت بتلمع ليه زمان
و دلوقت غطاها الأنين
وازيك انت وعامل ايه ؟
هل لسه صامد ولا ايه ؟
مش ناوي ترجع للزمان
مش ناوي تنسي اللي كان
امتي هتمسح دمع العنين
وترجع البسمة لشفايفك
وتنادي اسمك مرتين
امتي هتحضن ضحكتك
قوم ياللا وارسم بسمتك
طنش وروق نعنش وفوق
قوم ياللا وافتح صفحتين
الاولي ليك والتانيه ليك
واكتب عليهم بالقلم
انا ناوي افرح حبتين 
انا ناوي افرح حبتين

شارك المقال

فيس بوكتويترجوجل +