نور العدوي تكتب: حول العالم


حول العالم
بقلم: نور العدوي

مين مننا ما بيحلمش إنه يلف العالم؟ بس إزاي! السفر ده مكلف جدا وبتاع الناس الفاضية والأغنياء بس! أحب اقول لك إن تفكيرك غلط، كمل قراية المقال، وأنت تعرف كبسولة السفر.

متطلبات السفر:

أولا، عشان نسافر لازم يكون باسبورنا ساري لمدة لا تقل عن ٦ شهور (هم عايزين كده)، طلعنا الباسبور خلاص؟ الحمد لله! نيجي للخطوة التانية ودي الأهم، نختار البلد اللي هنروحها، وهنا هنلاقي أنواع  كتير قوي من البلاد، منها بلاد من غير فيزا لحاملي الباسبور المصري، ومنها بلاد بفيزا عند الوصول، وفي بلاد بفيزا إلكترونية، وبلاد بفيزا مسبقة هنتكلم عنها في مقال منفصل.

اخترنا البلد ومعانا الباسبور والفيزا؟ نبدأ نحجز الطيران، ونصيحة، بلاش تاخدوا معاكم وزن أكتر من ٧ كيلو؛ لأن أحيانا بيكون في عروض كويسة بس من غير وزن إضافي، و ده هتلاقوه دايما في آسيا وأوروبا، وعشان نحجز الطيران ونجيب أفضل سعر، الموضوع محتاج شوية تركيز، ومن أفضل مواقع حجز الطيران الموقع ده: www.skyscanner.com

حجزنا الطيران وحددنا التواريخ الحمد لله؟ يبقى خطوتنا الأخيرة هي خطوة الإقامة، وقدامنا كذا حل، من ضمنهم الحلول المتعارف عليها وهي الفنادق، بس بما إننا من أنصار مدرسة السفر منخفض التكاليف، هنحجز بيت شباب (هوستل) بالمعنى المتعارف عليه، وفي حل آخر، هو إن حد يستضيفك، وده عن طريق تطبيق اسمه "couchserfing"، وهنتكلم عنه في مقال منفصل برضو.

كده باسبورنا معانا، فيزتنا معانا، حجز طيارتنا معانا، وإقامتنا، نيجي بقى لخطوة مهمة جدا، إننا نقرأ كويس عن البلد اللي إحنا رايحينها، الطقس، الأماكن السياحية، القوانين في البلد، ثقافة البلد، نصائح عامة من الناس اللي زاروها قبل كده، يعني بمعنى أصح تعيش الرحلة قبل ما تروحها.

خلصنا كده تفاصيل ما قبل الرحلة، تابعونا في المقال القادم.


الإبتساماتإخفاء