حنان العقباوي تكتب: بينما أنت تلهو، كنت أنا وماما وبابا وناهد وكلنا بنلهو برضو!


بينما أنت تلهو، كنت أنا وماما وبابا وناهد وكلنا بنلهو برضو!
بقلم: حنان العقباوي

بالطبع لا يخفى على أحد من متابعي مواقع التواصل الاجتماعي، أنها أصبحت منبرا هاما لمن كان جادا ويريد أن يحسن من أوضاعه الحياتية بصفة عامة، فكثيرا ما تصادفنا نصائح في شتى المجالات الحياتية، سواء كانت للحياة العملية، أوالزوجية، أوالعاطفية..

مقدمة عميقة أهو عشان تتأكدوا إني بعرف أفتي كويس زي بقية الناس! وطبعا الكلام العميق والنصائح اللي بتدلدق دي خلت الـ Social Media قاعة محاضرات تنمية بشرية كبيرة قوي، عموما، وبرضو إحقاقا  للحق يعني، أنا مش ضد ده بصفة عامة، لأن في النهاية دي صفحتك، ومن حقك تشخبط فيها براحتك، بس أنا ضد جو التنظير اللي فاق الحدود على كل هفوة بنعملها في حياتنا، يعني فجأة الـ Facebook بقى مليان Posts عميقة كده في كل المجالات، إشي نصائح بنكهة دينية مليانة افتراءات على الدين وديننا منها براء، وخاصة في مجال الحياة الزوجية، ويا سلام بقى على التحليلات العميقة لأفلام لطيفة وخفيفة، وما عنديش أدنى شك إن المؤلف والمخرج والممثلين ما جاتش في دماغهم الأفكار بنت الذين دي وهم شغالين على الفيلم، وبرضو نصائح لزجة كده تنتمي للـ Feminism والـStrong Independent Women...

المهم بقى، الفترة اللي فاتت، كان في Trend لا يقل سخافة عن الحاجات اللي فاتت، اسمه "بينما أنت تلهو كان أحدهم يصنع المجد"، وكأن  كده في مصانع للمجد زي مصانع الحديد والصلب كده، وطبعا كان دايما مصاحب للـ Posts دي صور لناس إحنا مش عارفينها، على أساس إن دول اللي صنعوا المجد وإحنا بنلهو دون أدنى إحساس بالمسؤولية!

هو طبعا أنا أكيد نفسي أصنع مجد، وأكيد أنتم كمان نفسكم تصنعوا مجد، وأهو يبقى 7000 سنة حضارة و2017 مجد، ما يضرش!! بس في الحقيقة أنا عندي سؤال لمؤلف هذه النوعية من البوستات، هو حضرتك ليه بتعايرنا بلهونا؟ لا حقيقي مش فاهمة! أنا حد لعبي ومستهتر، ممكن حضرتك تقول لي أنت صنعت إيه غير التنظير والتبكيت فينا وخلاص؟! وبعدين أنا أفهم إن اللي بيعاير حد ده يكون عنده سبب مادي وجوهري للمعايرة، مش تعايرني بمجد حد تاني أنت أصلا ما تعرفوش! ده حتى مش ابن خالتك مثلا! بص، أنا هقول لك، اصنع أنت المجد وأنا هديك براءة اختراع، إنما ما تقعدش تعايرني في المطلق كده وخلاص! أصل على فكرة مجدك مش هتصنعه على الـ Facebook بشوية Posts لناس مش عارفينها! ولا هتدخل التاريخ بكلام عن التنمية البشرية أقصى مجهود بذلته  فيه هو الترجمة!

نهايته.. بجد يا جماعة، وحياة أغلى ما عندكم، بطلوا تقفلوا في الناس وتنغصوا عليهم حياتهم كده، أصل كلنا في الهوا سوا، وكلنا بنلهو عادي، سيبوا الناس تافهة زي ما هي طالما هما عاوزين كده، عاوزين تلهو الهوا بعيد عننا.


استفيقوا يرحمكم الله..


الإبتساماتإخفاء