مصطفى فهمى - مخطط ماسوني



مخطط ماسوني

مصطفى فهمى
امي اللي روحها بتعزف حنان 
وابويا اللي سيرته بتسبقها "كان".. 
صورة بطاقته وشهادة الشهود
وفرشة سريره اللي أخشابه زان.. 
مُُُخطَط ماسوني
عشان يحبسوني
يقومو يجيبوني ف هذا الزمان..! 

مُخطَط لئيم لماعز عظيم
بيرؤس ويزعم شوية حريم
مابين ساحرات 
وعبدة شيطان..! 

كلام الغناوي اللي خلاني غاوي
قعاد في القهاوي 
وعشرِة دخان.. 

انين النايات وحزن العيدان 
مخطط ماسوني
عشان يخنقوني
فـ بيفكروني بصوت الكمان.. 
وصوت الكمان 
كان بـ الهم أجمع 
بيصرخ وانا أسمع 
ويصرخ وانا أسمع 
واول ما أدمع 
يصرخ كمان..! 

قصايد لدنقل، وشعر الشهاوي
وبنت الجيران.. 
كلام المنابر، ونضج المشاعر
مخطط ماسوني 
عشان أبقي شاعر في غير الأوان..!

سهر الصحاب وشرب الهباب
ورصة كراسي الجلوس في اللجان.. 
مخطط ماسوني
عشان يمنعوني
فـ بيسقطوني بسؤال في امتحان.. 
مخطط ماسوني لناس فهموني
إن احنا عايشين 
مخطط لئيم لماعز عظيم
بيرؤس ويزعم شوية حريم
مابين ساحرات
وعبدة شيطان..!