أبانوب السيد إبراهيم - لا تجادل ولا تناقش يا أخ علي


أبانوب السيد إبراهيم

زمان بس مش كتير أيام عم غاليليو لما فكر وبحث واكتشف كرويه الأرض رجال الدين وقتها كانوا محبكينها شويتين وقالوا انه مجنون وعشان يخلصوا من الحكايه دي قتلوه. 

ارجع شويه كمان أيام أجدادك اللي عمال تتفشخر بالمقابر بتاعتهم وجثثهم اللي قاعده زي ما هي لحد دلوقتي.. وقتها كان لكل مواطن اله بيعبده بس لما جه عمك إخناتون وبدأ يفكر قال اكيد للكون اله واحد.. اكيد هو اللي خلق الإنسان والحيوان والنبات.!

ومن ساعتها بدأ التوحيد.. وفي نفس ذات الوقت ده كانوا بيبنوا الاهرامات بطريقه هندسيه جننت اللي خلفونا ف العصر الحديث.. وفي نفس الوقت برضه بنوا المعابد وحفرو ف قلب الجبل مقابر لدفن الملوك .. هندسه ورسم وفلك اعجاز لحد دلوقتي العالم يشهد بيه.. والاغرب من كدا انهم كانوا بيحلقوو دقنهم، طب ازاي وزمان ماكنش فيه مكن حلاقه؟

الفكر زمان وصلهم يعملوا كل الحاجات ديه ..

اللي معالي جناب سياده حضرتك بتتباها بيها .. دا لو ما كنتش متطرف وارهابي وشايف الحاجات دي اصنام وحجاره استغفر الله العظيم ... يعني الفكر زمان وصلهم لوجود خالق للكون ووصلهم كمان لعمل حضاره بقالها 7000سنه ..

بس اللي فات دا كله عمال اقولك زمان طب دلوقتي ؟؟؟؟

للأسف اللي بيفكر بنقول عليه كافر ملحد زنديق ابن كلب اه والله زمبقول كده 

بالنسبه للدين اوقات بنقوله الجمله الشهير لا تجادل ولا تناقش يا اخ علي واللي يفكر يطور ويغير من حياته بالعلم مع ان كل اللي بيعمله انه بيطبق العلم في بيته ف لبسه ف أكله انه ازاي يعيش حياه سعيده بطريقه اسهل وابسط يعني موصلش انه يخترع حاجه لسه... بنقوله اتنيل يا شيخ عيش عيشه اهلك الله يرحم ..

وغيرها كتير من الجمل المنتنه بس مش اكتر من اللي قايلها طبعا .. لحد ما وصلنا لمرحله الانسان ماقبل البدائي انسان بيصحي بسرعه عشان يشتغل بسرعه عشان يتجوز بسرعه عشان يخلف بسرعه عشان يعجز بسرعه عشان يموت بسرعه.

انسان متدين بطبعه يقوم يصلي عشان ربنا يكرمه في الطريق بوحده حلوه يتحرش بيها 
بيصلي عشان ربنا يسترها معاه ف النصبايه اللي راح يعملها علي الناس، بيصلي عشان ربنا يقويه انه يقتل انه يسرق انه يشرب انه ..انه...انه 

وبفكر ف العلم كل يوم .. انه يستخدم التلفزيون اللي صنع ف الصين والتليفون اللي جاي م الصين ويلبس القميص والبنطلون المستورد عشان ماركه ويركب التاكسي او الاتوبيس لللي جايين من بلاد الكفار..

الخلاصه ان الفكر مازال حر ان كان في الدين او العلم التغيير فقط ف اللي بيفكروو ..

1 comments:


الإبتساماتإخفاء