ماجى مجدى - كل الطرق بتوصل للموت ..!


ماجى مجدى

كان فى زمان حجه حلوه اوى و اتعملت فى افلام كمان و هيا إن لو عاوزين نشترى ارض او بيت من اصحابها و رافضين بنقول و ننشر حواليهم اخبار بأن البيت ده مسكون و كان فى ناس بتعمل اعمال و دجل و شعوذه عشان تتطير الناس من البيت.

حاسه إن اللى بيحصل ف العريش ده زى كده بالظبط .. عندى شك فى الحكومه إنها السبب المباشر ورا اللى بيحصل ده .. و لو مش مباشر فهو غير مباشر فى تقصيرها فى المحافظه على الامان بالنسبه لينا .

طب لو مباشر يبقى السؤال هنا .. بيعملوا كده ليه ؟!

ممكن نقول مثلا عشان يوصلوا كام رساله ، منها إن اللى باقى من اهل العريش لازم يسيبوا بيوتهم و اراضيهم زى اللى اتهجروا تحت مسمى إن وجودهم فيه نسبه خطوره كبيره بسبب الارهاب اللى مبيتنهيش و اللى الحكومه فشلت فى محاربته او كسلت تحاربه من الاساس عشان الشعب يفضل متعلق فى ديلهم .. بس لو اخدوا بالهم هيلاقوا ان تكرار الارهاب بدأ يتقلب عليهم .. مره فى التانيه حاولنا نتشعبط فيكوا بس انتوا بتخذلونا و بيموت مننا مئات كل شهر غدر و نبقى اغبيا لو فكرنا انكوا ممكن تقدروا تساعدونا فلازم تتغيروا فهننقلب عليكوا فى الاخر أكيد و مره فى مره شعبيتكوا هتقل .. ممكن بردو نقول انهم بيعملوا كده عشان يفضلوا يثبتوا إن الاخوان كانوا ورا كل حاجه بتحصل إنك لو عطست حتى دلوقت و انت بتقرأ فـ ده سببه الاخوان و ابواب الارهاب اللى فتحوها علينا و إن هما بقالهم اكتر من اربع سنين فشلوا فى سد الابواب دى و منها دعايه فاشله للريس اللى هو ممكن يمدوا الفتره الانتخابيه و تبقى ٦ سنين او ٨ لان احوال البلد حاليآ لا تسمح بإجراء أى انتخابات رئاسيه عشان احنا فى حاله حرب .
طب لو سبب غير مباشر ، هيبقى ليه مقصريين فى حق حمايتنا ؟! 

بعنى مثلا ليه دايمآ بتعملوا ضرباتكوا ضد الارهاب بعد الحادث مش قبل الحادث .. فين استشعاركوا الامنى ؟! 

طب كل مره بعد الحادث بنسمع عن مهاجمتكوا لبؤر الارهاب .. هل يا ترى الضرب ده لبؤر عشوائيه و لا للى عملوا الحادث .. و هل البؤر دى انتوا عارفينها من البدايه يعنى .. و لما انتوا عارفين كل حاجه و عارفين اماكنهم كده .. سايبنهم ليه ؟! بتستنوا ليه لما يحصل انفجار ؟

بس أنا مش هستغرب من انكوا سايبين الناس تموت ، بسبب كذا حاجه واضحه زى الشمس : أصل الموت عادى عندكوا ، لما بتسجنوا الشباب و تسحلوهم و تعذبوهم فى السجون و تقتلوهم فالموت عندكوا يبقى عادى ، لما مستشفيات الغلابه يموت فيها كل يوم ناس بسبب إن مفيش تجهيزات تنفعهم و لا فيها ادويه يبقى عادى الموت .. و لو قعدت أقول من هنا للصبح هنلاقى إن كل الطرق توصل للموت .


كل ما ورد عالية يعبر عن وجهة نظر شخصية للكاتب ولا دخل للموقع بما تتبناه أقلام الكتاب أو توجهاتهم الفكرية.