ضياء العجيزي - يا أيها الناس اسمعوا


 بقلم: ضياء العجيزي
كتبت الشعر وفضحني
وكاشف سِتر أبياتي
لا سمّا علية ودبحني
وفاتني لحالي يوماتي
أغض الطرف يجرحني
يا مِيلة بختي وخيباتي
كتبتة عشان يفرحني
أتاري كتبت آهاتي
مجرد حرف يمدحني
مقابل كشف سوءاتي

يا أيها الناس إسمعوا
أنا المسنود علي الضلمة
وشايف بكرة كشاف
في عز العتمة والضلمة
وعايش حلم شفاف
ومتسفر بكام كلمة
كلمة كأنها حرف 
وكلمة كأنها شطر
وكلمة تخبي 100 كلمة
أنا التاية في كل الشعر
وأنا اللي لوحدي وقت اللمة

يا أيها الناس إسمعوا
ناتج حنيني مشفتهوش
رسمت بكرة معشتهوش
الإمتحان كان سهل جدا
أصعب ما فيه لون الوشوش
صورة باهتة شايفها عمدا
حتي الملامح بانت رتوش
واللي فاكرهم كانوا عونا
عادوا أوحش م الوحوش
والعيون باتت وحيدة
هربت م الجفن الرموش
والقليب دقات حزينة
دقات ضعيفة..مينعشوش

يا أيها الناس إسمعوا
ويا أيها اللي مسمعتوش
حياتنا تملي تسرقنا
وبنعيشها فشوش ❌ فشوش
نرسم بكرة بالالوان
يطلع بكرة منشفهوش
نستني الوعد يتحقق
كأن الوقت مغشوش
طابور الحلم متكدس
شراع الحل متنكس
وكل الصحاب ميتأمنوش

يا أيها الناس إسمعوا
أنا العادي اللي بيعاني
في اذهانكم وأحلامكم
كرهت أعيش في جلبابكم 
وأنا الحلم اللي متفسر
غصب يارب بمزاجكم
أنا الحبر اللي متسطر
وجف الحبر علشانكم
قتلت الحزن لو كشّر
زرعت الفرح علي بابكم
حبست الدمعة للخلوة
رميت البسمة قدامكم 
وأنا والله متدغدغ ومتكسر
وقافل نفسي علي نفسي
ب100 باب ومتسكّر
وجاهز للبكا قلبي 
تبثوا كل أحزانكم
أنا اللي تملي براعيكم
لا يوم جيت علي بالكم

يا أيها الناس إسمعوا
عاذِر كل اللي يعرفني
حقيقي بجد معرفنيش
واهم كل اللي يشرحني
لكنة حفظني مفهمنيش
أنا المحذوف في كل النص
بكون موجود لكني مفيش
وأنا المتاخد نسخ وقص
لكن في paste متلاقنيش
أنا اللي مكمل جميع النقص
لكني بنقصي فايدة مليش
وأحب الفن إلا الرقص
ووقت العرض متشوفنيش

يا أيها الناس إسمعوا
بهادي روحي للدمعة
مفيش ولا مرة خذلتني
ولمة صحبة ع القهوة
باعت فيا وسابتني
تطيب روحي للوحدة
وأصفي لنفسي تعاتبني
ولا تغدرش كما الخلان
نفوس تشبة بني إنسان
حبيتها بجد ..كرهتني
بآمن ليها من عشمي
مصاحب ليها من غشمي
ورد جميلها.. خانتني

هام جدا

السادة قراء، وكتاب موقع ورقة - war2h الكرام

خلال أيام يتعرض موقع ورقة للتوقف نظرا لحلول موعد {التجديد السنوي للدومين سيرفر} الخاص بالموقع.

لذلك نطلب من محبي موقع ورقة ومتابعيه قراء وكتاب، بالمساهمة الرمزية لضمان استمرارية دعم الموقع للكتاب الشباب وخدماته المختلفة والمجانية.

للمساهمة من خلال

- فودافون كاش: 01065704571
- اورانج موني: 01277756120

للاستعلام عن الوسائل الأخرى المتاحة

يرجي مراسلتنا عبر واتس اب على اى رقم من الارقام عاليه