حازم أبو زيد - ضحكة السكرات


حازم علي أبو زيد

انا اكتر واحد مش بحكي 
وفي عز الضحك بداري دموع
مش لازم يعني اكون باشكي
واعيد وازيد ليكوا في الموضوع
ولمين او ليه اشكي وابكي
ما انا طول العمر عايش موجوع
     * * *
وفجأة ببص مالقتنيش
كأني مافيش
ورق شفاف 
ولا بيتشاف
ولا بيتحس
فأخترت اعيش في دور الخرس
لا عمري في يوم شكيت وبكيت ولا قولت حرام
وجوايا كلام
كتير مكتوم
لمين احكيه
وانا محروم
يا دوبك بس قبل ماا انام
بفكر فيه وفي الايام
وامثل نومي
واحكي لروحي عن يومي
وعن جرحي وهمومي
لحد ما انام

   * * *
عايش مدبوح 
بتطلع روحي بشويش
وانا كاتم وجع السكرات
بضحكة وراها  وجع واهات
ما هو يا عم بيبقي ساعات
بي​جي الموت في صورة العيش