مصطفى مقلد - إنسحاب


مصطفى مقلد

رجعت الحدوته تاني لمبتداها
رجعت السكه المتاهه لخطوتينك
لسه شداك من عيونك
نسمه للأحباب وتعويذة سفر
وإنت بتسلم حضورك ..
للغياب
يابو خطوتين على كل سكه
ودقّتين على كل باب
ودفّتين على شط
طب ليه ما غفلتش عيونك وانسحبت
طب ليه فضلت تحارب الموج والطوفان
قلقان وملو عنيك حنين
من فين بتبدأ رحلتك يا سندباد
واقف قصاد الريح جريح
واقف قصاد الموت ألم
يلزمك مركب ولازم بيه هتغرق 
الطوفان دايما معاندك
ينتهي ومن تاني يبدأ
الطوفان وياك مسافر 
وانت خارج عن حدود الممكنات
مستحيلاتك حكايتك
اللي تصبح فيه تبات
إنت َلو كنت إنت منّك
كنت تخلق معجزات 
تكتب النور ف البطاقه
تخترع ف الحيطه طاقه 
تنشر النور ع البحور
بنت حور خطفت فؤادك 
وانت راحل من يوميها
بنت مين البنت دي؟
بنت من دفتر قديمك
من تباريح البدايه
لسه بتكحل عيونك من جمالها
لسه بتراهن على فكرة وجودك
باحتمالها..... للغوايه 
رايتك المكسوره ع الشط المهاجر
والفنار تذكار قديم
من بدايات الحكايه
المشاهد زي ماهي
لسه بتحب التماهي ف روح جراحك 
جوه روح حدوته شاخت
العيال ملّت سماعها
قصه شايخه من صِباها
لسه واقف زي ما انتَ 
معتقل جوا القصايد والمتاهه
سندباد من غير مراكب
صاحب الحكايات
مخاوي
كل حواديت الغياب
ما اعْتَرفتش بالهزيمه
اعتِرِف بالانسحاب..

هام جدا

السادة قراء، وكتاب موقع ورقة - war2h الكرام

خلال أيام يتعرض موقع ورقة للتوقف نظرا لحلول موعد {التجديد السنوي للدومين سيرفر} الخاص بالموقع.

لذلك نطلب من محبي موقع ورقة ومتابعيه قراء وكتاب، بالمساهمة الرمزية لضمان استمرارية دعم الموقع للكتاب الشباب وخدماته المختلفة والمجانية.

للمساهمة من خلال

- فودافون كاش: 01065704571
- اورانج موني: 01277756120

للاستعلام عن الوسائل الأخرى المتاحة

يرجي مراسلتنا عبر واتس اب على اى رقم من الارقام عاليه