مصطفى مقلد - ما تتخضيش



مصطفى مقلد 
ما تتخضيش !
ببصمة روحي وبقلبي
سايب لك فيش.
سايب لك نص حدوته
عشان باقي الحكايه تعيش
سايب لك عمري ..وفّرته
معاه ذنبي وكفّارته
ياريت القطر صفّارته
ماتخدعنيش
سايب لك حلم كان أبعد
ولسه بعيد
وكان وسط الزحام أوحد
لكنه وحيد
أعيد ازاي عليكي الجرح
وأحكيلك
وأنا- لو جاني – 
هل مسموح لي أشكيلك ؟
هل مسموح لي إني اشهد ؟
أنا لو تهمتي موتي 
طبيعي ان اللي مات
مايجيش
وأكون إزاي
وأنا سلمت إني فراغ
أنا سلمت إني مافيش
يجوز صوتي
ما كانش بقوته واصلك
يجوز وصلك
ما كانش بقوة العاصفه
يجوز القلب كان أضعف
وكان - رغم الوهن – أصفى
يجوز الوصفه
كانت بره ملكوتنا
أكيد مُتنا
وأرواحنا ماهيش عارفه