Uncategorized

“الغول” بقلم عبير أحمد حواس

عايز أقولك سر خطير..!!
و اوعى تقولي يا باشه في بير..
أصل حقيقي الأمر خطير..
مش مستحمل للتأخير..
كان في غفير.. عامل نفسه أنه كبير..
نازل ضرب.. وقتل.. وحرق..
في كل جميل..
ابن الأيه !!.. داهية عليه..
خلي المحشي بقى بيتكلف ألف جنية..
رز بعشرة و أُوطه بعشرة..
أما الباقي كيلو بانيه..
أيوه يا بيه !!
اللي هينطق.. غموا عنيه..
واقرو الفاتحة العصر عليه..
ياعيني عليه..!!
كان واد أهبل..
صدق انه.. هيفتح بيت.. بالكام ملطوش و السته جنيه..
30 نيلة عليكَ يابعيد..
كنت انا عايش قبله سعيد..
أه ياعبيط..
بكره العيد.. قولنا مُبارك..
قالوا عبيد..
قلت عبيط.. مالكوش دعوة..
بس ألاقي شقة فول.. أفطر بيها..
زي زمان من عند.. الغول..
الغول.. كلنا واحنا شربنا..
أكبر مقلب في التغيير..
الأفضل اسكت..
أحسن عمو بتاع الفول.. قصدي.. الغول..
يقطع عيشك ويقولك كفياك الفول..
يلا يا طور..
امسك دول..
حط عليهم 100 مليون..
فقر وجهل وذل كمان..
وان سألوك قول بياع..
باع الارض بـ حبة رز.. وحط اللحمة في التلاجة..
اه يا سذاجة..
حد يصدق ان الديب بيشرب مايه مـ التلاجة !!
ياعم أونطه..
يلا عشان حضرت الشنطه..
بألف سلامة..
بس أمانة.. اوعي تسيب الواد محروس يرسم قطر..
أصل تملي بيكتب سطر ويسيب سطر..
ينزل يجري تحت الكُبرى..
زحمة وهيصة وخلق رخيصة.. مالهاش ديه..
مين قال شاري مين قال ليا ؟!!
يلا ياهانم يلا يابيه..
يلا بسرعة هنقول آلا تري..
خدها الباشا أبو دبورتين.. إسمالله عليه..
زي الوحش يشبه أبوه ماإنتوا أكيد عارفينُ الغول ؟!!..
طب راح اغور..
بس وصية.. إبقوا إكتبو علي قبري ضحية..
عاشت تحلم بالحرية..
أأأه يابهيه..
قتلوا عيالك وانتي صبيه..
النخاس باعها سبيه..
وقال حرية.. ايه يا عبيد !!
احنا الاول نبني البيت..
اصلي عبيط..
مش راح اصدق.. انه العيد..
ممكن أكون الصبح ضحية..
او قربان علي باب البيت..
لا متخافش مش فاضيين..
أصل لقاء الواد محتاس ؟!
مالي شاشات التلفزيون..
واحمد موسى وي البكري..
عاملين الحفلة..
على فستان البت نوال..
هروح أتفرج.. يمكن ألاقي حاجة مقاسي..
والله مآسي..
ناس عاشين وناس بتقاسي..
مر الحوجة..
يلا انا مالي.. مش مبسوط ؟!!
يبقي كفايـة..

مقالات ذات صلة

اترك رد

إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock