Uncategorized

ياسمين محمود تكتب “الوصية”

   

وآآآه من صرخة مكتومة
وآآآه من كل شيء سابني
وآه م الآه وكتمتها
وحزن الدنيا جه وصابني
وآآه من قهرة الدنيا وموت بيموِّت العايشين
بياخد جسم للتربة وسايب ذكرى في الغربة بتقتل في اللي مهتمين
وهَندَه مين وهاجري لمين
ما كله بيمشي مش دايم
يا هاااايم وسط أحزااانك متتهورش وتعدي
ف ضحكة وشي مين قدي
تقضي اليوم نكت وهزار
يطفّي النار
وعاملة حصار
لأحزانك
وآخر الليل بتتهدي
وكل الدنيا دي ضدي
وقلبي مش هيستحمل
لا حمل كلام
لا حمل سلام
لا حمل أوهام يعيش فيها
وذكرى تجيني أوديها
تروح لاخواتها وتكمل
معاهم سكة التوهه
وآآآه تاني ما نيش قادرة
وعايزه ارتاح
وعايزه ارجع أشوف تاني
دموعي ستاره بتخبي
عنيا فـ وقت احزاني
ما نيش شايفة
ما نيش شايفة
الأمان خالص ..
وواحد جاي يجرَّحني
كفاية الجرح مش ناقص
هتعمل ايه
هتعمل ايه
هتإذي ف واحده مأذيه؟!
هتبني بيوت وتهدمها
بحِجَّة “لأه مش هي”
تروح وتعيشلي أيامك
وسايب فيا أوجاعي
وذكرى أبويا لساها
وسايب ذكرايات ياما
وسايب حزن جواها
وبتسلم ..
وآآآه من قلب متألم
وكاتم برضه مبينطقش
لا قادر إنه يتكلم
ولا يعافر بحَبِّة ضعف
وغدر الدنيا مبيخلصش
يا رب الصبر من عندك
وحَبَّة فرح على قدي
بحلم بسيط وأشوف بابا
أو انجح في اللي بتمناه
أو اكتب شعر أو حتى
تاخدني يارب وابقى معاه
ساعتها هحس بالدنيا
ساعتها يحسوا بوجودي
وهيقولوا عليا كلام
دي كانت مبهجة جدًا
وكانت مخلصة جدًا
وعاقلة بس مش جدًا
كانت هبلة لبعض الوقت
ساعتها عنيكوا هتدمع
وصوت صرختكوا هتسمع
وأشوف مين فيكوا يدعيلي
وهاعرف قيمتي ايه بالظبط

أمانه عليكوا يوم ما امشي
تكون الدفنة من غيركوا
ما نيش عايزه الزحام يعني
دعاكوا واصل لي بالأسماء
مفيش داعي
خلاص مش راجعة والله
لا شعر كتير ولا صداعي
ولا فيديو ولا سيلفي
يا امي مش هتختلفي
مع اخواتي عشاني خلاص
ولا هبكي ولا هصرخ
واقول مش حاسه بوجودكم
وفين الحب والإخلاص
ولا هعملي في شوية
ويتقاللي بلاش اوفر
وهتلفو بشنط صدقة
وفيها بيجامتي وبلوفر
ومش متبقي غير شعري
وكام صورة
واسمي بضحكة مكسورة
وفاتحة بتتقري ليا
دعاكم ليا هحتاجه
يجيلي بإسمكوا هديه
ولو سامعني دلوقتي
ف ده مش شعر
دي وصيه

قبر ابويا
قبر ابويا هو قبري ..
متبعدونيش كمان عنه وانا في الدنيا بتمناه
ف خلوني ساعتها معاه
وادعولنا أنا وهو
هكون في القبر من جوه
لكن شايفه الجميع بره
هكون ساكتة و مضطره
لكن والله مبسوطة
أنا في الجنة دلوقتي
ف وقت الفرح جه وقتي
وقبري حتة م الجنة
وجالي وقتي واتهنى
وبابا
ف حضني وكويس
خلاص مش هبقى يوم وحدي
كفايه وحدة الدنيا
دموعي ألف في الثانية
وناس تدخل حياتي تروح تسلم دور لناس تانية ?
وانا ..
أنا عمري ماكان يوم ليا مكان وسط الصحاب أو في اللمة
أنا دايمًا في الصورة لوحدي
وببين اني المهتمة
بحكاوي الناس قصة بقصة
احكام بتزيد علشان بضحك
خلصتوا كلام؟
عذرًا.. لسة
من حق الناس تحكم برضه
مين واحد يترك يوم ارضه
من غير ما يحطله يافطة وسور
لو كل الناس دخلت فيها
هتنام وهتصحى تكونلك بور
وانت ياعيني محلتكش كتير
غير حبة خضرة بتربتها
وأذية تزيد بعشم دايم
ك صبية بتجري لوالدتها
وقابلها الحضن بضربتها
وعشمها الزايد موتها
الموت..
الموت مش بس بـ روح طالعة
ولا إن الجسم يكون بهتان
الموت إنسان عايش متهان
متهان من كل اللي مقابله
أصحابه وأحبابه وأهله
واحكام متتابعة بتجلد فيه
وهيعمل ايه ..
وهيعمل ايه وسط القسوة
وايديه ممدودة عشم زايد
وقابلتوا إيديه بضم ايديكم
ف هيصبح قاسي ف وسطيكم
وتعيبوا عليه
مغرور جدًا
شايفين البيه .. ?
مش عامل حتى حساب لينا
عامل مش عارف أسامينا
ولا حتى بيسال  في الاعياد
وده عمال يعمل ويسوي
وكلام يتقال يتباع في مزااد
مييين هيزود
مين أحسن واحد هيجود
ويموّت صورة بضحكتها
وانا أصلًا ف الصورة لوحدي
ف الدنيا بنورها وعتمتها
مش فارقة كتير ..
ومفيش شيء فيها عشان يتشاف
وان في ..
شفاف
ك شوية ناس مش مهتمة
ف انا بفضل برضه لا ليا مكان وسط وسط الأصحاب او في اللمة
ويقولوا عليا ما تتسمى
سيبانا وواقفة بتتصور
وسيبوها عشان مش طيقانا
عملالنا كئيبة وقرفانة
ف انا بفضل في الصورة لوحدي
ويمر الوقت وبيعدي
باكتشف إن أنا احسن بكتير
من ناس علاقتها اساسها نفاق
أو حد كبير والكل وراه علشان مصلحته
أصبح متساق
وشوية ناس ملهمش سياق
كل اللي ف بالهم يتلموا
بيخافوا تصيبهم يوم وحدة
ف يعيشو الدنيا ف وسط طابور
وانا برضه مليش في اللمة مكان
وانا أَخري بيبقا شوية ضحك
وهزار عالماشي عشان شكلي
وببان بضحك وباقول عادي
لو مرة اتكلم ف مشاكلي
وباقول هانت ..
وانا كل حياتي بقت ذكرى
وما فيش أفراح جاية لبكرة ولا فيه أفراح صارت كانت
ما خلاص بانت ..
الدنيا مهياش للطيبة
والعيبة الآن إنك طيب
إن كنت بعيد مش هيحبوك
وهيبعدوا لو كنت قريب
وعلى ده الحال
الطيب مال
وملوش في الدنيا من الاموال
ولا م الصحبة واللمة نصيب
الطيب خايب في الدنيا وهيجي يعيش وهيمشي غريب
وملوهش حبيب ولا حد يطبطب على كفه
بس أما هموت ..
الكل هيجي و يتلفوا
ويقولوا عليا كلام ياما
وأهوه جالنا خلاص وقت قيامة
لا هينفع اب ساعتها الام
ولا ساعة فرح وساعه تغم
ولا ايد هتضم تدفينا
ولا حاجة هترجع تحيينا
نعمل للآخرة حاجات تنفع
القسوة ساعتها هتإذيكو
وانا طيبتي ساعتها اللي هتشفع
ونصيبي أنا ناسياه م الدنيا
في الآخرة أكيد أجمل بكتير
لا هيبقى ساعتها في ناس بتلوم
ولا فيها هموم
و ولا قلة نوم توجع قلبي من كتر القهرة و م التفكير
وساعتها بجد ان جم قالوا
إزَّي أحوالك دلوقتي
ف لأول مره هارد بخير
أنا قلبي بخير ..

مقالات ذات صلة

اترك رد

إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock